MissMo家洛不和浮面

【明報專訊】唔少政圈中人都知，公民黨陳家洛同毛孟靜一路都唔係太夾，過去已無乜兩句，但兩個甚少鬧交鬧出面，不過因為一單賑災撥款，就令到毛孟靜公開同陳家洛劃清界線。事源陳家洛喺財委會有關四川1億元撥款賑災一事，提出咗一個動議，要求特區政府將錢捐畀非政府組織，令捐款可以直接幫居民，但毛孟靜噚日就表明「陳家洛動議不代表我！」


唔單止喺財委會上公開劃清界線，毛孟靜亦為撥款一事好嬲，星期二晚已經喺facebook上兩次表達不滿，公民黨慣於星期二晚召開執委會，佢當晚就寫﹕「今晚開會拍枱！支持1億撥款？是什麼東西圖以公民黨的名義代表我」；另一留言更加直指有記者話佢知，「昨有不知什麼東西斬釘截鐵跟傳媒說，敝黨支持1億撥款。好彩冇幾個記者睬佢！」


fb稱對「什麼東西」不滿

雖然佢無明言口中所指嘅「什麼東西」係邊個，但呢個「稱呼」可謂對黨友十分不客氣，Emily八卦之下得知，本周一該黨陳家洛就有同過部分記者講，支持賑災撥款，若將兩事一齊睇，的確令人聯想毛孟靜所指嘅係家洛，Emily噚日未見到兩人，未能夠問清楚事件，有網民喺facebook上問邊個係「什麼東西」，毛就話係佢呢生人遇到一個「最計算」嘅人。