公民黨挑戰陳茂波

【明報專訊】雖然發展局長陳茂波早前寫blog批評團體就中環軍用碼頭嘅指控「毫無理據」，但似乎無助平息外界疑慮。公民黨陳家洛同多個關注事件團體，噚日召開記者會反駁陳茂波，仲向佢下戰書，邀請佢去中環海濱辯論，交代點解係都要將解放軍碼頭規劃成軍事用地。


公共專業聯盟黎廣德話，翻查過去資料，發現回歸以來，解放軍軍艦只係嚟過香港4次，每次停留亦唔多過10日，認為政府根本冇必要將呢個範圍劃成軍事用地。


本土行動發言人朱凱迪亦話，根據《駐軍法》同《公安條例》，政府一旦將碼頭範圍列作軍事用地，解放軍將可全權決定邊個可以入去及負責管理用地，擔心解放軍到時唔會信守承諾，將用地開放畀公眾。


相信大家都記得時任發展局長嘅林鄭月娥，當年曾單刀到皇后碼頭同保育人士對話，唔知過去大多透過寫blog發表意見嘅陳茂波，又有冇呢個勇氣應約呢？