西九「爆屎」 巨鴨無事

【明報專訊】噚日網上流傳「西九爆屎」，原來係西九「M+進行：充氣！」戶外充氣雕塑展覽嘅展品爛咗兼漏氣。事緣呢幾日狂風暴雨，被網民笑似糞便、由美國藝術家設計嘅《複雜物堆》展品，因為抵受唔住風吹雨打，噚日突然爆開，穿咗個大窿。漏氣之後，啡色嘅展品塌咗喺地上，有網民笑稱今次真係「搞到一地都係」。韓國藝術家嘅《色即是空》黑色吹氣蓮花亦漏氣，變成殘花。


主辦單位話，呢幾日天氣惡劣，搞到兩件展品損毁，已立即維修，未知幾時修復完，但展館會如常開放。


西九：天氣惡劣致損毁

唔少網民睇到呢個消息，立即問同樣都係充氣展品嘅Rubber Duck（見A6）「會唔會爆㗎？」海港城就大派定心丸，話鴨仔多次喺世界各地展出，香港展出嘅鴨仔跟足之前嘅設計，相信可以順利展出。