戴耀廷妙喻：佔中似煮寧波湯圓

【明報專訊】自從港大學者戴耀廷拋出「佔領中環」方案後，幾乎每日打開報紙都見到相關報道，有人就擔心港人會因為吸收太多佔中嘅資訊而厭倦，但戴耀廷就冇有怕，仲形容搞佔中有如煲寧波湯圓。此話何解？


冷熱水梅花間竹咁煮

佢話，早前睇到一個烹飪節目教煮寧波湯圓，先至發現原來唔係就咁放入滾水就得，而係要用滾水、冷水梅花間竹咁煮，咁至可以確保湯圓內外都熟晒。佢話搞「佔中」亦一樣，不斷煲熱個議題，只會令到佢「面熟內不熟」，間中冷卻一下反而更好，「有人話我走得太快跟唔上，消化唔切個信息，其實我自己都跟唔到自己！冷卻一下反而畀我有多啲時間坐低寫文章做論述」。


佢話，即使傳媒家減少報道佔中，到6月9月舉行第一個商討日時，自然又會重新抓緊港人目光，所以唔會擔心。佢又透露，目前同港大民意研究計劃總監鍾庭耀合作搞嘅電子投票系統，已去到討論技術問題嘅階段，相信好快成事。