CY：唔係政治騷

【明報專訊】政府推動「全城清潔運動」，問責官員過去一連3日落區，呼籲市民注意衛生，噚日就輪到律政司長袁國強去西環石塘嘴街市「搞衛生」，但Emily唔止見到袁司長，仲見到特首梁振英（CY）突然現身，兩人逗留約十幾分鐘，喺街市清潔樓梯，又抹乾淨街市外嘅石櫈同廢物回收箱，仲向市民派發消毒包。


CY話原本無計劃親身參與，但見到咁多個官員落區，而且自己已經睇咗好多文件喇，覺得都應該親身落區。對於有人認為活動係「政治騷」，佢就話唔係嘅，認為官員有責任落區，提醒市民重視個人衛生。


林鄭：愛做家務無唔慣

至於早幾日已經落完區清潔嘅政務司長林鄭月娥，噚日接受電台訪問時就話自己其實係一個鍾意做家務嘅人，鍾意親力親為，所以無唔習慣。林太仲話，見到某啲報章有負面報道，覺得活動係「政治騷」，佢就認為，或者係傳媒生態競爭，要配合讀者口味，但政府確實無幻想要靠呢啲活動，去令市民覺得佢哋喺施政方面做得好，佢哋都係想活動可令市民加強衛生意識。