僭建新聞攞獎 CY甩底

【明報專訊】香港報業公會噚日舉行最佳新聞獎頒獎典禮，原本話由特首梁振英（CY）主禮，咁啱今年《明報》偵查組同事憑揭發唐英年、梁振英僭建嘅新聞，奪最佳獨家新聞獎冠、亞軍，以及最佳新聞報道冠軍。Emily事前諗住見證CY親手頒獎畀明報同事嘅歷史時刻，點知CY甩底，改由政務司長林鄭月娥上陣，林太致辭後就以公務為由，飯都唔食就走先。


林鄭：揭秘係傳媒天職

事後Emily問報業公會，公會話特首辦3星期前已書面通知無法出席，最終協商由林鄭代表。面對上司CY僭建醜聞成為頭版新聞獲獎，林太噚日致辭時話，做獨家新聞、揭秘新聞係報紙天職，又話「今日得獎嘅一啲獨家新聞，雖然未必係我哋好樂見。但係呢，我覺得佢哋都係扮演緊傳媒嘅天職」。


盼有更多正面報道

林太話，最近有同事叫佢唔好睇咁多新聞，因為外國有研究顯示，睇得多新聞會令人感覺負面。不過，佢認為呢啲建議係「斬腳趾避沙蟲」，但佢期望傳媒將來有更多版面報道正面消息咁話。


今年明報喺各部組同事努力之下，合共奪得12個獎項，當中以偵查組收穫最豐，除咗憑唐、梁僭建報道獲3個獎項，佢哋仲憑《不當商業行為系列調查報道》獲最佳經濟新聞冠軍，偵查組同事陸文亦以採訪李旺陽家人等多篇報道獲最佳新人獎冠軍。