湯家驊慘被篤背脊

【明報專訊】財政預算案嘅拉布戰拉鋸無止境，議員繼續被困立法會。主持會議嘅立法會主席曾鈺成「吊頸都要唞氣」，先後請內會主席梁君彥同內會副主席湯家驊頂替，等佢可以食飯。


何俊賢投訴舉手快無得講

過去少有主持大會會議嘅湯家驊（Ronny）坐上主席台，面對「長毛」梁國雄每隔幾個字就要求點算人數，都顯得有啲無奈，仲慘被民建聯何俊賢向曾鈺成「篤背脊」。


事緣公民黨郭家麒噚日喺會議發言時，何俊賢同長毛都舉咗手，最終Ronny就畀長毛講先，結果長毛要求點人數。曾鈺成其後返回主席位，何俊賢即時向曾主席「投訴」，話自己之前舉手快過長毛，又話郭家麒講嘢係咁重複喎。


「體會曾主席辛酸」

Ronny就慨嘆，收到議員投訴話郭家麒講嘢重複，已經即時提醒佢，又話做咗代主席短短1個鐘，已經鳴鐘3次，又畀人投訴，所以絕對體會到曾主席嘅辛酸咁話。