家是香港新歌 黃霑有份填詞

【明報專訊】政務司長林鄭月娥牽頭搞「家是香港」宣傳運動，隆重其事創作咗一首主題曲，搵天王級歌星張學友同埋陳奕迅合唱。但一睇之下，呢首新歌嘅填詞人竟然係去世多年嘅黃霑。再睇真啲，原來呢首叫《同舟之情》嘅主題曲，係糅合當年《獅子山下》舊歌其中一段主調歌詞同旋律，所以作曲者有郭偉亮（Eric Kwok）同顧嘉煇，填詞人有陳詠謙同黃霑。


張學友陳奕迅合唱

政府「家是香港」嘅網頁噚日首播《同舟之情》，仲出埋新聞稿請張學友同陳奕迅大談香港之情。新歌旋律緩慢，歌詞都係大談獅子山下同舟共濟之類，但其中一句都幾有意思，「一家親親到有時矛盾 不必以敵人自居同舟之情 攜手走過崎嶇」。講到矛盾，即刻諗起前全國政協劉夢熊早前爆料時話，有叫過特首梁振英唔應該視民主派為「敵我矛盾」。


張學友今次唱好香港，佢話作為香港人，有啲嘢仲值得我哋珍惜，又話「我相信香港一定會更好」。陳奕迅就話首歌帶嚟唔少回憶，喺80年代讀小學嘅時候，有啲車仔檔喺街上跑走鬼，「天星碼頭……太平山頂……聽完感覺很鼓舞、好熱血」。


想聽呢首歌，可以登入http://www.hkourhome.gov.hk/chi/song.shtml