支持佔中與否 林以諾現階段唔講

【明報專訊】林以諾牧師呢排真係好紅，不時出現喺港聞版面，但大多係捲入政治事件。噚日「佔領中環」發起人之一朱耀明牧師，喺電台話林以諾支持佔中；身在台灣嘅林以諾打電話畀Emily澄清，佢係有打過電話畀朱牧，但只係講不反對佔中，不等於自己支持佔中。


只說「不反對」

林以諾話，可能朱牧誤會咗，佢當日主動搵朱牧，係因為有傳媒寫佢反對佔中，而當時朱牧正同中國基督教播道會港福堂牧師吳宗文喺傳媒大談佔中，佢唔想任何人誤會，於是打電話畀朱牧澄清。朱牧同Emily講，佢只係話林以諾不反對佔中，唔知係咪傳媒會錯意。


林以諾強調，自己係支持普選同民主，但佔中係咪唯一爭取嘅方法，其實家都未有答案，所以佢都唔會喺現階段講支持佔中與否。


被叫「梁粉」喊無辜

另外，早前林以諾喺網上頻道「CHANNEL J」訪問特首梁振英，有人形容佢係「梁粉」，林以諾大呼無辜，佢解釋「CHANNEL J」舊年特首選舉時，先後訪問幾個人選，包括馮檢基、何俊仁、唐英年同梁振英，之後邊個當選，佢哋都諗住會跟進，「若果係唐英年贏，我都會訪問佢㗎！」佢仲反問﹕「如果我訪問李柱銘，咁我係咪會叫做『李粉』呢？」林以諾話自己從來唔想參政，之前有人叫過佢參選選委，佢都拒絕，佢只希望專心做佈道工作。