范國威趁墟搞鴨仔團

【明報專訊】將於5月2日至6月9日喺維港暢泳嘅巨鴨Rubber Duck，風頭一時無兩，立法會議員范國威都忍唔住要「利用」佢一下，搞咗個名副其實嘅鴨仔團！

喺5月26號，每位只要畀132蚊（將軍澳居民權益會會員128蚊），就可以參加呢個團，名額暫時60個。Gary喺海報上話，呢個「睇巨鴨食片皮鴨」親子鴨仔團行程豐富，會先到尖沙嘴觀賞巨鴨Rubber Duck，再到紅磡享用北京片皮鴨，抽獎禮物就係鴨舌，全程團友仲要戴鴨嘴帽，話唔係鴨仔團都無人信啦。