新丁議員未見大懶蟲

【明報專訊】天主教監察組過去不時發表報告，批評「大懶蟲」議員，噚日監察組就為一眾新丁議員，做咗個上任100日成績表。結果顯示，考勤方面，28名新丁議員表現大致滿意，未見到有大懶蟲唔開會嘅情况；新民主同盟范國威、新民黨田北辰分別提出咗6次及5次修正案，會計界梁繼昌亦提出過6次質詢。


不過，部分建制派就被點名話唔夠勤力，例如民建聯葛珮帆、鍾樹根、何俊賢，同埋獨立嘅謝偉銓、姚思榮同廖長江，都未曾提出過動議同質詢。發言方面，人民力量陳志全同公共專業聯盟莫乃光都發言過22次，葛珮帆、何俊賢同經民聯嘅張華鋒只得4次，睇嚟要急起直追喇。


喺議會唔表態，即係投票不在席或者投棄權票方面，亦係建制派上榜，其中民建聯梁志祥同陳恒鑌，都有超過三成投票不在場。投棄權票方面，葛珮帆就超過四成，佢黨友蔣麗芸同何俊賢緊隨其後，錄得38.8%投棄權票。