嫌工聯集會太嘈 康文署激嬲嫻姐

【明報專訊】近年唔少遊行示威人都批評警方阻撓，不過噚日連工聯會搞遊行都受到干預，但被批評公僕就由警方變成康文署，工聯會榮譽會長陳婉嫻噚日畀康文署激到紮紮跳，仲同康文署職員講，如果覺得佢犯法，可以告佢！乜事搞到嫻姐咁勞嘈？原來噚日工聯會集會期間，有個康文署職員用iPhone測現場分貝，嫌主辦單位太嘈，阻止佢提高聲浪。

嫻姐話集會向來都係大聲，噚日佢一入修頓球場已經覺得唔妥，理事長吳秋北發言時更加「無聲」，相信大部分參加者都聽唔到，於是佢咪叫負責音響同事加大聲音，點知同事即時眼望望，原來有個康文署女職員在場，表明佢音量超標，嫻姐叫同事調校聲音時，康文職職員幾乎出手阻止。

嫻姐唔客氣咁同對方講「呢度係我主場」，點知對方亦不甘示弱，話個場係康文署借出，嫻姐畀佢激到怒氣，高呼「如你覺得我犯法，就告我陳婉嫻」，最終對方無奈下報警，警方最終以無人投訴為由了事。嫻姐直言好嬲，批評特區政府做法係「阻住香港遊行集會自由」，話政府嫌嘈就唔好借場。佢同Emily表明呢件事要搵康文署長馮程淑儀算帳，甚至要立法會跟進！

康文署：場地噪音被投訴

康文署回覆Emily話，過去曾收到市民投訴團體修頓球場造成噪音滋擾，所以有需要時職員會用儀器度音量，噚日職員就收到市民投訴，佢發現音量過高，於是勸喻主辦單位降低聲浪。康文署強調無干預遊行，絕對無侵犯集會自由。