林健鋒細個前舖後居

【明報專訊】唔少市民近日不斷向Rubber Duck「朝聖」，不時去到青衣附近睇鴨蹤，Emily同事日前採訪港版「膠鴨之父」林亮，即係立法會議員林健鋒嘅爸爸，佢提供咗唔少舊相，包括一張林健鋒只得兩三歲嘅細路仔相，只見小健鋒坐喺舖頭櫥櫃上面，原來當時林家都住喺舖頭裏面，因為林爸爸打工嘅永新塑膠廠係前舖後居，所以林健鋒細個都成日坐舖頭㗎。


林健鋒話，永新塑膠廠嘅地址家已經變成住宅，大約喺灣仔修頓球場對面，當時佢哋一家住喺閣仔，細個無乜嘢做，當然會出去舖頭坐，佢話亦因此好熟悉塑膠生產程序，不過呢個地方都唔算住咗好耐，後來林爸爸創業，成立福和塑膠廠，於是一家就搬咗去西營盤喇。