毓民內地「打敗」鐵甲奇俠

【明報專訊】早前立法會財委會討論撥款1億去四川賑災，人民力量黃毓民席間大罵以前捐去內地賑災錢唔知去邊，批評捐錢只係對內地表明效忠，唔係真正用救災上，強調反對撥款。呢段大鬧政府片段，呢兩日紅爆內地網站，截至噚晚9點，已有約130萬人次點擊過睇，登上內地網站優酷搜索榜首位，唔少內地網民都讚好。

睇片網民多來自廣東

優酷上，唔少網民睇完都覺得黃毓民講得好，話忍唔住睇完又睇，亦有網民話「自己唔爭氣無怪乎被人抗拒」，亦有人話內地被掩蓋事實，要「上網路看一下國際天下共知、唯獨中國內地人民不知的事實」。不過，毓民言論網民當然唔係一面倒支持，亦有人批評香港人自私，話日後香港有事，到時亦可以唔幫手等。

無論如何，短片紅爆，黃毓民亦登上優酷搜索榜首位，擊敗歌手王力宏同鐵甲奇俠。優酷網亦有為部分有資料網民做分析，50萬睇過有關片段網民中，最多屬廣東省網民，其次係上海同北京。

唔少網民都好奇點解呢段片仲未被「河蟹」，黃毓民同Emily講，可能內地維穩人員五一黃金周放晒假，令到條片突破封鎖，仲未被刪除，佢笑言家內地多人認識佢，就會千方百計搵佢其他言論睇。聽日財委會將會就1億撥款再闖關，毓民估計4個鐘會議，就算佢唔拉布，都未必夠時間審議撥款。