梁繼昌忽然批佔中？

【明報專訊】繼《大公報》早前被指錯報國家主席習近平微服出巡搭的士，另一親中報章《文匯報》噚日亦搞錯嘢，今日要澄清更正。《文匯報》噚日刊登一篇題為〈梁繼昌劃清界線 撰文批佔中〉嘅報道，話屬於泛民嘅梁繼昌狂轟佔領中環行動。梁繼昌噚日見到都感到莫名其妙，原來係《文匯報》搞錯，把署名「楊繼昌」寫嘅評論當咗係梁繼昌，搞到梁即刻要同文章劃清界線，並且出聲明要求《文匯報》更正及道歉。


文匯老總：今澄清

Emily打電話去《文匯報》搵總編輯李曉惠了解一下，李總就斬釘截鐵咁講，呢單嘢好簡單，係記者搞錯咗，所以今日會刊出澄清更正。Emily噚日仲喺《文匯報》網上版搵到篇出錯嘅文章。呢篇文章嘅內容，大概係講「梁繼昌」喺facebook撰文，批評「佔中」同埋拉布者嘅人，指呢啲係「離地中產、買辦政治」，為自己打造「光環」，實為「香港失敗民運模式」。


梁繼昌噚日唔敢怠慢，一早出嚟見記者澄清，仲出埋聲明，佢話無喺facebook批評佔中，相信文章引用嘅係另一人，即楊繼昌嘅觀點。二人都係叫做「繼昌」，但立場南轅北轍。


梁繼昌話，「對於《文匯報》將他人文章的觀點放於有關本人的新聞報道中，本人對此感到十分詫異及遺憾。」為免令人誤會，梁繼昌重申，香港喺政制發展嘅問題上已到咗關鍵時刻，「本人認同市民及公民社會以任何和平、非暴力的方式爭取落實普及而平等的民主選舉制度」。