蘇錦樑抱大隻孫女

【明報專訊】商務及經濟局長蘇錦樑（Greg So）榮升爺爺，佢個中澳混血孫女前幾日滿月，佢本來諗住請記者食薑醋，點知好食得滯，已經食晒，不過記者仍然有口福，事關蘇太秘製嘅豬肉乾同埋蘋果批同樣了得，食到唔少記者唔停得口。


蘇太親手做嘅豬肉乾係焗嘅，唔係燒，唔會咁熱氣㗎。Greg So大讚太太廚藝，話太太最拿手嘅都未出場，就係肉桂麵包，下次可以再叫太太整，但係要佢透露秘技就唔得。


笑到見牙唔見眼嘅Greg So又話，佢個孫女係大隻B，出世有8磅9安士，澳洲新抱喺當地生咗成3日，都仲要堅持自然分娩，真係令人佩服！蘇爺爺話，「蘇蝦」英文名叫Caitlin，代表純潔，爺爺見佢成日郁手郁腳成個功夫BB咁，就專登用李小龍同BB啲相整咗條片，真係估唔到Greg So都鍾意玩「戲仿」。