范國威推佔中T恤六四賣

【明報專訊】「佔領中環」係近期嘅熱門社會議題，新民主同盟立法會議員范國威（Gary）反應好快，諗到用佔中嘅牌頭搵錢，以佔中為設計理念，整咗幾款T恤，諗住喺六四集會及七一遊行時喺街頭售賣，計劃每件售100元（圖）。Gary否認藉佔中「抽水」，佢話售賣嘅收益，一成會捐畀佔中行動，但餘下大部分係支持新同盟。


新同盟借佔中搵錢，佔中倡議人之一朱耀明牧師就話，噚日至知有人用佔中嘅名去整Tee賣錢，佢話稍後會了解一下。


否認抽水收益一成捐佔中

Gary話，Tee款設計已構思咗好耐，而佢趁五一假期動手去做，放咗幾款設計草稿上網，並會把最多人like嘅設計做實物Tee。佢話打算整4款，除咗「和平佔中」，亦會有「愛港不愛黨」標語等款式。而「和平佔中」嘅設計，仲有印度聖雄甘地嘅插圖。


件Tee賣100元，Gary就話成本都要幾十元，因為如果用白底tee，就要用美國布料，因為物料厚啲，無咁易透底走光。佢話呢幾日會落實Tee款設計，趕製一批喺六四晚會攤位銷售，睇吓巿民反應，加製喺七一遊行時賣。