肖鋼籲青年監管者 貢獻中國夢

【明報專訊】上任之後一直保持低調嘅中國證監會新任主席肖鋼（圖），除咗出席一啲論壇之外，都未曾向股市股民發表講話。前日傍晚，中證監網站上載佢一篇題為「與年輕的資本市場共進」嘅文章。當大家以為內地股市終於出現「肖氏新政」，原來篇文係叫人「做夢」。


原來肖主席係為咗和應國家主席習近平所提出嘅「中國夢」理念，適逢今日係中國青年節，所以佢就特登呼籲證券期貨監管系統的青年人要做資本市場改革、創新、發展嘅生力軍，為「中國夢」做貢獻；每一位證券期貨監管者，亦都應該做「中國夢」嘅實踐者。不過咁，市場對於肖主席所講嘅資本市場中國夢真係各有各演繹。有人認為可以令內地股民唔需要血本無歸就已經實現「中國夢」；亦有人話，最好嘅夢梗係A股可以返去6000點水平啦；但點都好，千祈唔好最終變成南柯一夢。