泛民建制上演誠信戰

【明報專訊】立法會拉布噚日踏入第9日，經民聯梁美芬噚日喺議事廳內炮轟拉布議員，但可惜就無乜火。事關佢同主席講，就住牙科服務開支，「我自己噚日（前日）坐咗喺度都已聽咗兩至三個鐘頭」，但就畀社民連梁國雄踢爆，原來立法會前日只係傾咗個半鐘牙科服務開支，連主席曾鈺成都出嚟佐證，話個辯論喺嗰晚9點10分開始，搞到梁博士畀人話「誠信有問題」。


梁博士就解釋，自己所提到嘅「兩三個鐘」，只係話坐喺度「兩三個鐘頭」，唔係只係講牙科服務呢個議題。


獨立謝偉俊就質疑，社民連成員亂撳升降機，梁國雄點解都唔認係佢助理，仲有乜誠信。


最終大家搞到人民力量黃毓民發火，講到明你鍾意玩我就同你玩，仲即刻話點人數，最終點咗4分幾鐘先齊人再開會。