六四展去美加阿人囡囡助翻譯

【明報專訊】支聯會由上年開始搞嘅六四紀念館搞得唔錯，今年首次衝出香港，遠赴美加多個城市舉辦六四展覽。支聯會主席李卓人亦會暫別「拉布戰」，到當地主持開幕禮，而今次嘅展板仲係由佢嘅囡囡適之翻譯。


阿人將主持開幕

阿人噚日透露，支聯會將於今個星期五（17日），喺加拿大溫哥華舉辦首個海外六四展覽，展出舊年六四紀念館嘅展板，之後會喺多倫多、紐約同三藩市舉行，務求令海外華人認識六四真相。


阿人嘅千金李適之喺紐約大學讀新聞系，佢笑言支聯會嘅朋友知道佢囡囡今年畢業，特登將紐約嘅六四展安排喺適之畢業禮前後幾日舉行，等佢一定可以出席。阿人仲好開心咁話，今次展板由適之翻譯，兩父女相隔兩地一齊爭取平反六四。