Ann姐被窒到「冇嘢講」

【明報專訊】預算案「拉布」3個禮拜，噚日由立法會主席曾鈺成「引刀成一快」剪咗。建制派成班議員好似被罰留堂，坐足咁耐，唔勞氣就假，難怪噚日早上，唔少建制派議員都把握「剪布」前搵機會出聲。其中，民建聯蔣麗芸（Ann）就大爆發，既要求提早剪布，又話身為黨友嘅曾主席蝦佢，皆因曾鈺成話佢講嘢離題，叫佢畀啲耐性聽。


就退保發偉論被令精簡

話說噚日朝早，Ann姐起身話，若果無人講嘢，不如提早中止辯論，毋須拉布拉到下午1點。主席就反駁佢，話好多議員都講明有嘢發表。Ann姐意猶未盡，學社民連梁國雄（長毛）就退休保障發表偉論，主席唔止叫佢精簡，仲笑佢講錯咗2030年做2003年，話「2003年係10年前，蔣小姐！」Ann姐被主席窒，黑面咁話「主席，雖然我哋係同黨（民建聯），你蝦得過就蝦，既然你蝦，我無嘢講」。


Ann姐事後同Emily話，主席偏袒泛民，好似啲阿媽咁，有事寧打自己個仔，目的係想表現公道喎。講講吓，工聯會黃國健（KK）行經，Ann姐只係厲咗一下，KK即刻走夾唔唞，幾乎嚇親Emily。


另外，長毛拉布經常都被曾主席話佢重複發言，長毛噚日就諗到點樣反駁，佢話真理愈辯愈明，話曾主席教數學，都係講番三角形內角總和係180度，係咪唔畀再講？曾主席即刻話，如果佢連續3堂都講同一樣嘢，校長都會警告佢，可見曾主席轉數之快。