黃國英費Sir上身 揀股排陣

【明報專訊】豐盛金融資產管理董事黃國英上個星期六開騷陣，忽然費Sir、摩佬上身，揀股票排陣去推介。就咁睇陣都幾過癮，有前有後、攻守兼備，第1個仲係「全華班」。

佢揀批港股去踢叫南華，排個有攻有守442，領匯做龍門（0823）一夫當關夠穩陣。粵海投資（0270）、港華燃氣（1083）同友邦（1299），呢收息股做後衛頂住。

領匯守龍門 前鋒搵翠華

兩隻翼用瑞聲（2018）同創科（0669），話佢有科技優勢，可以邊路快放。前鋒博品牌股增長勁，搵翠華（1314）同新秀麗（1910）去搶分，睇個牌面隻隻都好強喎。

之不過，黃國英嫌上面個陣星味唔夠重，引入外援搞隊皇馬。龍門同後防基本一樣，中前場轉玩進攻陣433，瑞聲、金沙（1928）搭埋中國建築（3311）踢進攻中場，餵波畀前面條鑽石鋒線。

引外援迪士尼與「鬼佬比亞迪」

鑽石級當然唔小，騰訊（0700）、迪士尼大家都識，「企鵝」年初至今升8%，而米奇老鼠加Marvel超級英雄，迪士尼今年到上個星期五已經升35%。

黃國英形容為「鬼佬」比亞迪（1211），同樣做電動車美國Tesla Motors做正前鋒，今年爆升1.27倍，連黃國英都話「睇小」。雖則呢股份升唔少，但佢話「球星」今年仲有力再上，唔使驚喎。

串串嘴佢自不然會「辣下火頭」，串有「芬佬」靠個名食老本，但一本事都冇。衰衰咁整兩張個樣矇晒相出，聲言唔開名串人，但一睇落去，點會唔知佢串緊係陸東同劉央。

email: [email protected]