巨鴨體檢 不日復出

【明報專訊】黃色巨鴨Rubber Duck喺尖沙嘴已經「游」咗兩個星期，但前晚起卻突然泄晒氣，變成一塊「鴨皮」攤喺海面，市民都好擔心佢係咪穿咗窿，要無限期收起。Emily問過主辦單位海港城，佢哋話放晒巨鴨嘅氣係因為上個禮拜佢經歷完大風浪，要做「例行檢查」，仲話巨鴨無被硬物刺穿或受到蓄意「襲擊」，檢查後會再同市民見面，但就確實唔到巨鴨幾時「游番出嚟」。


未知幾時游番出嚟

巨鴨噚日成隻扁咗咁浮喺海面，到下晝再由躉船吊起檢查及維修，由於部分「鴨皮」載咗海水，工作人員要用水泵將海水排走，先可以進一步將「鴨皮」吊上岸。唔少到場睇鴨嘅市民，見巨鴨「唔見咗」都好失望；主辦單位就貼出告示，指橡皮鴨要稍為「休息」，「檢查身體」，全面檢查後會再充氣展出。


海事處發言人就話，噚日收到主辦單位通知要將巨鴨吊上岸維修。海事處已要求主辦單位聘請特許驗船師，檢查巨鴨同佢嘅繫泊設備，證明穩固安全，先可以重新將巨鴨放回原定展出位置。


CCTV微博打氣

巨鴨「漏氣」連內地新聞機構都關注，南都周刊同央視新聞嘅微博噚日都有發表相關消息，其中央視新聞嘅微博仲留言為巨鴨打氣﹕「小黃鴨在香港維多利亞港孤身漂了12天後終於撐不住而倒下了……小黃鴨，你要堅強啊！」