佛誕也倒數 讓市民反思

【明報專訊】Emily噚日收到採訪通知，話一個名為「港九各界慶祝佛誕倒數籌備委員會」，主辦單位噚晚喺尖沙嘴五支旗杆進行佛誕倒數。咦？乜唔係聖誕、除夕先至有倒數，佛教都興倒數？


佢哋10多人，帶同樂器，11點左右開始唱歌。接近11點即子時，佢哋一邊敲起木魚，一邊倒數，慶祝踏入佛誕日。


主辦人：當係行為藝術

原來呢個活動唔係佛教團體搞嘅，佢哋反而大部分係非佛教徒，目的係藉佛誕日諷刺近年商場嘅倒數文化。活動發起人雷先生同Emily講，大家可以當佢哋嘅活動係行為藝術，「聖誕節好多商場都搞倒數，其實係抽空咗宗教本身，我哋想諷刺呢個行為，就想到用最大對比，佛誕日都搞倒數，等市民反思一下」。