真普聯開會 一講中聯辦，靜晒

【明報專訊】爭取2017年普選特首嘅真普選聯盟，早前訂出7點共識，近來正積極會見各個團體，而且逢周三開會傾日後工作。Emily聽聞，前幾日開會其中一個議程，就係關於同中聯辦溝通。


點解開會有呢個議程？係咪真普聯準備同中聯辦會面？原來唔係，有與會者同Emily講，若中聯辦提出溝通，真普聯應有乜嘢態度呢？所以有人提出真普聯內部應先討論，希望喺呢個情况出現前，大家先有個立場同說法。


不過，當講到呢個咁敏感嘅議題，與會者幾乎鴉雀無聲，大家都唔表態，結果傾唔到乜。又係嘅，須知3年前民主黨同中聯辦談判，至今仍然令「公投派」及其他相對激進民主派反感。大家今時今日搞真普選，謀求最大共識，都係唔好咁快突顯分歧啦。