社運女將陳倩瑩幫張國柱手

【明報專訊】唔少活躍社運嘅人，正職比較少人知，其實當中部分人被民主派立法會議員吸納做助理。噚日以民陣警權關注組召集人身分開記者會嘅學聯前秘書長陳倩瑩，不時現身社運，當年更因衝擊遞補機制諮詢論壇被入罪，噚日佢同傳媒交換卡片時，先發現佢家喺社福界議員張國柱辦事處做政策研究主任。


陳倩瑩話幫咗阿柱約半年，主力負責全民退保同教育等政策，雖然認同工黨理念，但佢無入黨，暫時亦無諗住參選，或者做幾年嘢再讀書進修吓。


泛民議員助手多社運人

另一民陣警權關注組召集人王浩賢，現時係立法會議員梁繼昌辦事處營運總監；至於社民連梁國雄，助理中亦有唔少社運人士，好似曾向時任特首曾蔭權掟粟米斑腩飯嘅黃浩銘、向前運輸及房屋局長鄭汝樺抗議港鐵加價而衝上台搶咪嘅黃軒瑋等。