馬時亨籲機構多提名傑青

【明報專訊】Emily記得上年十大傑青「唔夠腳」得8個，於是趁噚日十大傑青記者會問首席評審、前商務及經濟發展局長馬時亨，上年係咪參加者質素偏低唔夠數。佢否認，話年年都競爭激烈，但轉頭又呼籲一向較少提名人嘅私人機構多啲提名員工參選。今年傑青仲拍片宣傳，但7月先播，到時提名期都差唔多完。


馬時亨話傑青評審要求好高好嚴謹，唔會特登選夠10個，所以上年得8個。佢仲話以往私人機構好少提名人，呼籲佢哋多提名傑出員工，甚至叫同事提名身邊人，等評審多啲「勵志故事」選。


今年傑青搵咗2002年得主、導演黃真真，將正生書院校長陳兆焯等昔日得主嘅故事拍成默片，「拉近傑青同市民距離」。傑青提名期今日起至7月18日，但套宣傳片7月先出街，如果早少少播放，或者睇到嘅人更多，宣傳效應更大呢。