財爺嘆政府「失匙夾萬」

【明報專訊】立法會主席曾鈺成上周「剪布」，財政預算案有望今周通過，但財政司長曾俊華仍繼續出力爭取民意，催谷議會盡快通過預算案。佢仲不惜「矮化」自己，話政府係「失匙夾萬」，如果無立法會批准，佢一個仙都用唔到，立法會議員先至係手執鎖匙嘅「Key Man」，而唔係配合政府嘅「大配角」。


「議員係Key Man」

財爺噚日喺網誌撰文，抬舉一眾立會議員，話佢哋角色好重要。佢透露過去一周出席兩個公開活動，先去科學園見證新一代電動的士面世，再到迪士尼為新主題區「迷離莊園」揭幕，但都係心繫預算案嘅《撥款條例草案》。財爺又話，庫務科上周四同醫管局、大學教育資助委員會、立法會秘書處會面，通知佢哋原定6月初嘅撥款好可能會延誤，仲話如果《撥款條例草案》唔能夠喺今個禮拜初通過，6月中嘅撥款可能受影響，呢啲機構要做好動用儲備嘅準備。


今年財政預算案，係財爺做司長6年以嚟花最長時間審議嘅一次。佢話如果「拉布」持續，其他議案好似買家印花稅、雙倍印花稅等草案都可能受阻；而紓困措施同發行新一期iBond等工作，都會受影響喎。