聽日股東會誠哥唔見記者

【明報專訊】李嘉誠每年總會喺長和系王國嘅業績會同股東會後見記者，講吓公司之餘，又交流吓對社會熱話嘅睇法，尤其點睇樓市，一年3次，Emily每次都期待。不過，嚟緊禮拜二嘅長和系股東會後，誠哥同管理層決定唔見記者喇。


集團已回應晒近期事件

噚晚Emily收到長和系公關溫馨提示，話今年長和系管理層唔見記者，叫Emily嘅同事唔使等。佢話距離3月尾嘅業績記者會未夠兩個月，咁短時間管理層無咩好講，所以決定唔開記招。


唔係喎！過去兩個月有好多關於長和系嘅新聞，例如國際貨櫃碼頭工潮、長實取消分拆出售雍澄軒嘅交易，仲有世界自然基金會香港分會同長實拆伙唔搞豐樂圍發展等等，上個禮拜Emily嘅同事仲諗住聽日問誠哥，家誠哥唔開記者會，班同事即刻好失落。長實發言人話，近排幾件事，長和集團分別回應咗啦，所以管理層已無嘢講！