葉太探掃把頭創造者

【明報專訊】新民黨主席葉劉淑儀當年嘅經典髮型深入民心，仲被人改咗個唔係咁好嘅花名「掃把頭」，呢個髮型係佢幫襯多年嘅坪石邨屋邨髮型師幫佢剪嘅。噚日葉太舊地重遊，幫民建聯陳鑑林個仔陳俊傑助選，當然順便探吓一班老朋友，包括佢嘅髮型師「高佬」。


葉太噚日喺facebook上載多張相片，話自己重臨舊地到牛池灣坪石邨。當年葉太喺飛鵝山大宅住咗18年，成日去牛池灣街市買菜，仲幫襯坪石邨嘅洗衣店、水果店，帶當時仲細個嘅囡囡睇牙醫，當然仲有去邨內嘅「高氏優美髮型設計髮型屋」，搵高佬剪頭髮啦。


約定帶囡囡返去敘舊

葉太話返到坪石重遇高佬、洗衣店同生果舖老闆，大家一見面就熱情招呼互相慰問，好似遇見老街坊咁親切，覺得好溫暖。佢仲同街坊約定，有機會會帶阿女返嚟敘舊。


記得2011年區議會選舉時，新民黨都有派人喺觀塘區參選，今次葉太跨黨派為民建聯助選，唔知係咪想借機會開拓九東，擴闊新民黨版圖呢？