今年無緣睹超人風采

【明報專訊】前幾日長實（0001）同和黃（0013）向各傳媒「溫馨提示」，話今年股東會後，將唔再安排記者會環節，「超人」李嘉誠以往點評經濟時事的場面，今年就唔會再現。唔單止旗艦長實同和黃兩家公司，長和系全系，都貫徹拒見記者方針，昨日三家長和系企業股東大會，管理層都係開完會即散水。


至於今日重頭戲長和股東會，雖然李嘉誠講明唔見傳媒，但小琴大膽估計，踴躍前來的各方記者，可能比往年有增無減。


酒店大堂變禁區 記者被隔離

噚日長和系3家公司，包括長科（0775）、電能（0006）同長建（1038）都響同一間酒店舉行股東會，管理層果然身體力行，話唔見就唔見，令在場幾十位記者「食白果」。


最令小琴意外嘅係，記者一入酒店門口就被隔開，只能夠響大堂咖啡室一個小小嘅臨時區域呆等，連坐都唔夠坐，就連去洗手間都要「稍移玉步」用餐廳洗手間，呢種安排搞到成個酒店大堂好似禁區咁，除咗股東之外冇人可以行近。


響咁嘅安排下，記者連想搵啲小股東傾偈都難，因為要同佢地傾就只能夠離開酒店，而大家亦都唔敢保證班管理層幾時會突然回心轉意同記者講兩句，結果大家都唔敢離開臨時區域。


花旗唱好長建 重申「買入」

雖然管理層避傳媒，不過券商花旗噚日就唱好長建（1038），讚佢響加拿大收購電力同天然氣業務成功嘅話，可以令明年盈利增加一成有多，所以將目標價由60蚊調高至66蚊，重申「買入」。


email: [email protected]