任大炮再發炮「胸罩貴過樓房」

【明報專訊】內地開發商華遠地產董事長任志强，因為出名口沒遮攔，一向畀人叫做「任大炮」。話說近排，大炮先生又管唔住自己把口，竟然喺出席活動嗰陣發表偉論，聲稱「按平米計，胸罩仲貴過住房多多聲」：咁抵死都講得出，真係唔鬧都唔得啦。


網民反駁﹕丁字褲面積近零 最暴利

「胸罩那麽大一點，要好幾百塊錢；按平米算，比房子貴多了」。任志强此言一出，就引來網友群轟。小琴見到，有自稱「胸罩聯合會」嘅神秘組織，即時喺網上列咗「五大理由」反駁任總：「因為面積接近於零，丁字褲才是最暴利的」；「胸罩不能囤，但土地能」；甚至仲有「胸罩從不強買強賣，更不強拆」，「胸罩業在大陸從未引起血案：任老闆，你敢代表開發商宣布嗎？」


最陰功係，由於任大炮當時係對住兩個女嘉賓講出咁嘅說話，搞到連人品都被質疑，有網友直呼「任（志強）很流氓」。不過話時話，小琴雖然都覺得任總講野實在冇經大腦，但亦都想幫佢辯解下：畢竟都係一時講笑，何况財經界有位咁真性情嘅國企董事長，幾難得啊。哎，任總啊任總，你再咁大口惹公憤，就要因住華遠啲樓賣唔出啦。