張華峯划浴缸 「識浮」唔怕沉

【明報專訊】旅發局每年搞龍舟嘉年華，其中「名人划浴缸邀請賽」係焦點之一。經民聯林健鋒（Jeffrey）透露，今年經民聯將派出「重量級」人馬、金融服務界張華峯（圖）參賽，至於佢拍檔就仍在商討，梁美芬係人選之一。不過，梁博士話唔想著泳衣參賽，所以只會考慮吓做啦啦隊隊長！


Emily噚日搵過峯哥，峯哥話經民聯的確叫佢同梁博士參賽，但佢就想同港台商貿合作委員會主席李大壯一齊參賽多啲。兩個都係「重量級」人馬，峯哥話唔怕沉船，因為自己「唔識游都識浮」！據了解佢有私下問過黨友參賽使唔使除衫同露肚腩，睇嚟出賽機會好大。


梁美芬話雖然唔想划浴缸，但到時亦希望「畀大家一個意外驚喜」，最緊要係可以好似佢個名咁「making fun（芬）」。梁博士仲笑笑口捉住Jeffrey，話要Jeffrey扮鴨！但Jeffrey就好似唔多想理，仲即刻走番入會議廳前廳迴避