250元睇245世界級藝廊

【明報專訊】藝術界享負盛名嘅「巴塞爾藝術展」，噚日終於由歐美移師亞洲，嚟到香港會議展覽中心舉行。首次喺香港舉辦，就吸引到245間世界級藝廊參與，展出超過3000名藝術家嘅作品。Emily估唔到，噚日天文台發出3年嚟首個黑色暴雨警告，主辦機構都堅持開幕。


巴塞爾展首來港

究竟點解會移師香港？藝術展亞洲總監Magnus Renfrew就話，同其他亞洲地區相比，香港位於亞洲區中心，從文化角度睇，認為香港充滿活力，亦有悠久舉辦藝術展嘅歷史，同埋思想表達自由。事實上，巴塞爾藝術展主辦機構喺2011年已收購咗香港國際藝術展嘅主辦機構，故今年開始就會取代以往嘅香港國際藝術展。


會展舉行至26日

Emily噚日去咗優先場先睹為快，其中一部分叫「藝術空間」，展示咗17件大型藝術作品，包括以瑪瑙石造嘅吊燈、分別用百葉窗同竹棚整成嘅藝術品。有興趣嘅市民，可以喺今日至26號到會展參觀，一般開放時間係中午12點至晚上7點，成人門票要250元一日，學生同長者則要150元。若想買4天展期通行證，就盛惠750元。


噚日展館嚟咗一個稀客，一隻畀雨淋濕嘅小麻雀「乘機」入場睇展覽兼避雨，佢留咗喺一個墨西哥畫廊。負責人講笑話，小麻雀停咗喺藝術品附近，都係展品之一！