立會秘書長都要靜心

【明報專訊】一行禪師噚日喺烏溪沙搞咗個4日「覺醒生活營」。Emily記得，禪師2010年訪港時，呢排一身蟻嘅湯顯明，同佢佛教徒女友陳詠梅都有去聽佛偈，於是去生活營睇吓撞唔撞到湯先生，結果梗係撲個空。


為時4日 要打坐慢行慢食

雖然見唔到湯顯明，但Emily見到立法會秘書長陳維安，唔知佢係唔係被立法會拉布戰拉到心煩氣躁，嚟聽佛偈紓緩心境呢？其實，3年前嘅生活營，陳維安都有去。


講番生活營，有營友話個營唔係有人想像中咁樣，絕對唔係「坐足一日」。除咗「坐禪」，營友仲會「行禪」、「食禪」同唱歌。行禪即係慢行，感受大自然靈氣；食禪即係慢食，感受食物同大自然嘅關係；唱歌就係要唱啲輕鬆、可以幫你「入禪」嘅歌。


生意失敗受啟發 商人見禪師「感動到喊」

喺內地搞消防用品生意嘅營友鄭明話，2007年生意失敗，公司營業額大跌九成，當時心煩氣躁，成日拍枱鬧人，迷惘咗足足3年。至2010年，佢讀咗一行禪師嘅書，領悟到原來成功同失敗根本唔重要，咁就令佢安定下來，不再迷失咁話。鄭明後來從禪師身上學識要發揮自己強項，聆聽別人想法等，啟發佢將生意轉型，仲令佢不再拍枱罵人，成為一個和善嘅人。


鄭明同Emily講，一行禪師對佢幫助好大，助佢走出低谷，所以佢每次見到一行禪師都會感動到喊㗎！