林鄭放假暫離熱廚房

【明報專訊】特首愛將張震遠因為商交所搞出一鑊泡而要辭行會職務，「最短命」嘅發展局長麥齊光又有官非，梁班子自去年上任以來，好似無一日風平浪靜。上述兩位仁兄，都係政務司長林鄭月娥讚賞推薦嘅，唔知林太係咪想喺呢個時候唞一唞，所以下周二至周五休假，暫避一下熱廚房呢？


下周放4日 張建宗署理

林太一向好打得，身兼扶貧委員會同人口政策督導委員會主席，又係梁班子嘅「奶媽」，大半年嚟幫局長擋駕，鐵人都要唞氣，新聞處噚日公布，林太下周二起休假4日。林太對上一次休假係4月，當時只休咗兩日。喺佢今次休假期間，「小肥張」勞工及福利局長張建宗會署理政務司長職務。


林太揹上身嘅都係今屆政府「重中之重」，若果無人幫手，真喺隨時做到暈。Emily噚日問公務員事務局，原來社會福利署長聶德權下月10日過去幫林鄭，做政務司長辦公室專員（特別職務）。呢個係首長級甲級政務主任，屬編外職位，為期半年，署長6月7日就last day平調過去。


Emily聽講今次聶署長過去係幫司長處理高層次同複雜嘅政策統籌工作，包括貧窮線、人口政策諮詢等。至於社署署長就由保安局副秘書長葉文娟升職補上，7月8號返工。


林鄭時薪60請人剪報

除咗高層次工作，林太嘅政務司長辦公室仲用5060蚊月薪請兼職合約文員，周一至五朝早7點半至11點，其實即係剪報紙，每日做幾粒鐘，計番時薪有成60幾蚊㗎！不過，做呢份筍工，要中學文憑試5科合格，有相關新聞工作經驗更佳喎。要做「好打得」手下，真喺唔易㗎。