活化中環街市最緊要內涵

【明報專訊】之前受《中區分區計劃大綱草圖》司法覆核影響，導致延遲落成嘅中環街市「城中綠洲」，市建局噚日向城規會提出規劃申請。負責活化中環街市嘅設計團隊，特地邀請項目顧問、日本著名建築師磯崎新（Arata Isozaki）參與揭幕儀式。


被譽為「日本現代建築界三傑」嘅磯崎新會見記者，闡述中環街市設計概念，佢話中環已經相當密集，今次設計不追求標奇突出，反而要保護中環街市嘅建築風格同內涵，有關改動影響原有建築愈少愈好。


磯崎新話，上世紀30年代香港建築物以橫向為主，自七八十年代起，建築物追求愈高愈好，但佢覺得建築物唔係單純鬥高或成為地標，反而要溫柔咁融合周圍環境。佢又話，中環街市同中西區嘅行人天橋網絡息息相關，期望項目能夠加強地區聯繫。