囝囝牛一家洛忙極都要陪

【明報專訊】本身已育有4個靚囡囡混血兒嘅政壇「多仔公」公民黨陳家洛，上年終於追到囝囝道明，話咁快道明BB今日就一歲喇！家洛話，雖然今日係星期六兼囝囝牛一，但因為佢上晝要開草案委員會會議，下晝又要去公聽會，只能夠抽出午飯時間嘅3粒鐘同家人慶祝。


時下唔少家長喺BB一至兩歲嘅時候，就安排定佢哋去上playgroup。家洛就笑言，自己冇咁嘅打算，事關佢屋企已經係一個playgroup，又話平時要抱道明都要排隊，相信有家姐照顧同陪佢玩都夠啦。


家洛一家計劃6月尾返波蘭外家渡假，但由於佢要參加七一遊行，可能要先折返香港再返波蘭。被問到點解佢唔考慮七一之後先至過去會合家人，佢話擔心太太一個人帶唔到5個小朋友搭飛機，作為負責任嘅男人，呢啲嘢都係博唔過。