環境局被批「固體廢物」

【明報專訊】政府推出10年減廢大計，環境局高官過去一個星期馬不停蹄出席活動，推銷新政策，但噚日唔知點解推咗香港電台邀請，唔派人出席《城市論壇》，主持謝志峰喺節目開始嘅時候話，已邀請環境局，但局方回應「因為公務未能撥冗出席」。謝志峰好無奈咁話，世界真係好難撈，佢前日同上司講環境局唔派人出席，佢上司即刻講咗句「真係都市固體廢物」。


學者倡效德國開採堆填區

環境局唔派人出席《城市論壇》，港台無再擺「空櫈」揶揄官員唔畀面，但獲邀出席節目嘅西貢區議員方國珊就打蛇隨棍上，話真係庸官當道，應該扔晒佢哋去垃圾堆填區咁話。節目無咗高官，火花都小咗，方國珊批評資源藍圖炒冷飯，舊瓶新酒；浸大生物系教授黃煥忠就較有建設性，佢話舊堆填區唔係無用，搞環保領先國際嘅德國，近年發展緊「landfill mining」（開採堆填區），將舊堆填區嘅有用物料好似紙、塑膠挖番出嚟，變番有用嘅物料。


黃教授話開採堆填區唔係無可能，香港上一代嘅堆填區關閉至今幾十年，要分解嘅垃圾已經分解咗，挖番啲垃圾出嚟，隨時可以轉廢為能。教授又話市民消費模式要轉變，唔好瘋狂購物，政府要推經濟誘因，鼓勵市民源頭減廢，咁先至有望達到10年人均減廢四成嘅目標。