財爺赴「洪門宴」

【明報專訊】立法會財委會拉布拉足133個鐘終於通過撥款，除咗醫管局同大學撥款延誤少少，其他撥款應該唔受影響。財爺曾俊華終於鬆一口氣，噚日仲好風騷咁喺網誌大曬拉完布第二日即刻去中華國術總會搞嘅「洪門宴」相片，仲同一班師兄弟聚舊話當年，紀念一代洪拳宗師林祖師父仙遊1年。


唔講唔知，原來財爺學拳好把炮，佢師父鄺鐵夫係林祖（傳奇人物林世榮嘅侄兒）門生，佢自己就係鄺嘅第一批弟子，每日由師父親身教授一招一式，雖然練習辛苦，但可以強身健體之餘，又可以鍛煉心智。


談師伯軼事勉青年

當日梗係有師兄弟示範拳腳套路同兵器啦，但活潑好動嘅財爺就郁都唔郁坐喺度睇，席間仲撞到闊別30幾年嘅師弟Malcolm，大家一齊睇番當年練拳片段，真係溫馨！精通劍擊打拳嘅財爺，仲喺網誌談到師伯林鎮輝講述佢年輕時跟爸爸學拳嘅軼事，以勉勵青年有一技之長。話說當時林師伯清晨4、5點鐘就由灣仔石水渠街嘅武館（即家嘅藍屋）出發，跑到半山練拳練劍，練完先返學，放學就到武館繼續練拳讀書，生活好有規律！