楊匡食「詐糊」

【明報專訊】社運人士楊匡呢排官非纏身，但成日去內地維權，結果缺席應訊，近日先畀公安遞解出境返港。Emily噚日喺支聯會六四遊行見到佢，本來想問吓佢未婚妻、內地維權人士劉沙沙有喜，會唔會想多啲返去陪佢安胎，點知楊匡尷尬地話食咗「詐糊」。


生BB無時間表

楊匡話劉沙沙早排因為身體有感覺，以為有咗BB，最終證實係誤會。佢話對於生BB無時間表，家主力關注內地人權同良心犯，戰場喺內地咁話。由於楊匡涉及非法集結同民間電台無牌廣播案，唔畀離港，所以佢話除非有大件事，唔係都唔會返內地。咁探劉沙沙又係咪大件事？佢無直接答，只係話睇自己工作同有無錢喎。


阿牛收7張傳票

另外，Emily噚日見到社民連曾健成（阿牛）喺民間電台街站宣傳。佢都畀多單官司纏身，皆因繼涉及民間電台無牌廣播案，又收到7張傳票，話佢舊年10月22至29日，喺政府總部平台嘅數碼電台集會上無牌廣播，下月17日去東區裁判法院應訊。阿牛話檢控係政治打壓，搵大炮打佢呢啲輕微罪行，又話呢項控罪無得申請當值律師服務，對佢唔公平。