岳少倡電影觀光路線

【明報專訊】港產片60年代興起，80至90年代環掃亞洲市場，雖然經歷過低谷，但亦都有《無間道》等叫好又叫座嘅電影。新任旅遊發展局主席林建岳（岳少）搞開電影，佢噚日出席中華總商會論壇時，話台灣近年力銷電影旅遊，不如搞番個中港台電影觀光路線，吸引遊客。


仲有人問《無間道》外景地

岳少話，有好多人都問佢，《無間道》其中一幕梁朝偉同劉德華喺天台演對手戲究竟喺邊度，想去睇吓滿足好奇心。今年台灣金馬獎正值50周年，文化部長龍應台推出文化觀光路線，其中唔少拍過電影嘅場地更成為旅客必到之處，好似《海角七號》喺屏東恆春、《不能說的秘密》喺淡水咁。


另外，啟德郵輪碼頭下個月開幕，岳少話郵輪喺亞洲仍屬起步階段，滲透率只有0.5%，同美國嘅3.3%相距甚遠。佢建議好似外國咁搞一程多站，將香港、台灣、廈門同上海連成一條郵輪航線。