議員扮消防員 體驗閃燃

【明報專訊】嘩，做乜公民黨梁家傑、民建聯葉國謙同葛珮帆、謝偉俊個個都變身消防員？原來佢哋噚日以立法會保安事務委員會成員嘅身分，到消防處西九龍救援訓練中心及消防通訊中心參觀。


今次參觀，消防處長陳楚鑫做導遊，帶議員睇消防員實火操練、搜索、救援行動，以及傷者處理示範，議員仲親身體驗消防員遇上閃燃嘅情况，認真刺激。之後佢哋到總部大廈消防通訊中心，參觀控制台運作。謝偉俊話，佢要求著消防員制服同埋孭氧氣筒等設備，感受消防員做嘢嘅時候，一身裝備究竟有幾重。本身較為高大嘅佢，仲好自豪咁話佢著消防制服真係幾似消防員，唔同嘅只係佢戴眼鏡。究竟有幾似，讀者自己衡量啦！