CY同3萬工人做早操

【明報專訊】特首梁振英噚日現身啟德發展區工地，同班官員一齊做熱身早操，呼籲建築工人開工前熱身，避免工傷意外。官員用意良好，但CY都係頭頭碰着黑，因為協助工人嘅工業傷亡權益會發出新聞稿，大鬧政府勞師動眾要3萬工人一齊做早操，話係毫無意義，仲令人反感喎。團體話近期多宗嚴重工業意外發生，死亡率上升，政府倒不如收緊職安法例，加重刑罰懲罰不負責嘅僱主仲有意思咁話。


團體鬧做早操無意義

CY噚日大清早同發展局長陳茂波等官員，到啟德出席「建造業安全周2013——零意外誓師大會」，聯同700多名工人做熱身操，為隆重其事，仲搞埋網上直播，聯同全港800多個工地3萬多個工人一齊做。

團體話近年工業意外死亡率上升，但CY發言時就話，2012年雖然工程量增加，但建造業意外率下降11個百分點，呼籲大家唔好自滿，希望僱主及工人都注重安全。佢仲提醒企業要搞「3P」，就係追求利潤（Profit）「P」同時，亦應同時追求另外兩個「P」：一個係人，「People」；另一個係地球，「Planet」咁話。

另外，CY發言時，話建造業大把機遇，仲話預計工程每年開支超過700萬元，但查實應為700億元。不過，CY今次都算老實，其後新聞處刊登佢發言稿，都照出佢講錯數版本，但加個括號（應為700億元）。