「港人講地」改圖 鬧學民瞓馬路

【明報專訊】被視為支持特首梁振英嘅「港人講地」facebook專頁，噚日出咗一個帖，討論遊行集會自由。呢個帖採用一張改圖，引述裁判官杜浩成早前就黃毓民和陳偉業前年七一遊行案件嘅判辭，「無論任何法律，不論你喜不喜歡，即使有強烈意見，除非被法院頒令有違基本法或人權法，否則都要遵守；否則香港核心價值就無從說起」。


喺這段話下面，係前日「學民思潮」成員參加六四遊行後，欲前往中聯辦途中一度被阻，成員躺臥馬路嘅大相，「港人講地」對此嘅描述係﹕「學民思潮成員遊行示威前拒絕申請，遊行期間衝出馬路，集體瞓馬路，癱瘓行車線達一小時，危害自己及其他道路使用者安全。」


此帖一出，唔少網民留意到，話「港人講地」都識改圖為CY造勢。學民噚日就繼續反駁警方，透過facebook指早就通知警方遊行路線，警方無反對，但警方到咗周日出爾反爾，要求學民走上行人路，學民成員先靜臥抗議，只望警方盡早開路，又指警方誣衊學民「霸佔」馬路，對此感到徹底失望。