女子伊院門外便溺 網民瘋傳

【明報專訊】有人周街小便？今次仲要被人影到兼放上網，有圖有真相，張相已被網民瘋傳。目擊兼影相嘅係網民Shally Chung，佢噚日驚見有個長髮女子除咗條褲，蹲喺伊利沙伯醫院主座地下大堂正門外，側邊有一大灘水，懷疑有人隨處便溺，大罵「大佬，今次係成年人喎」。


伊院：十分關注

咁大個人，係咪真係咁急呢？睇張相，個女人衣著打扮都叫正常，Shally仲好細心，留意到「（女人）佢又幾有技巧㗎！屙喺後面唔會整濕自己個手袋！」原來個女人將手袋放喺佢前面嘅垃圾桶旁邊，懷疑係尿液嘅一灘黃水，就喺背後流到一地都係。個女人當時仲望住鏡頭，旁邊有途人都為之側目。網民瘋傳張相時，有人就話呢個女人係強國人，不過大家都無證據，就暫且唔好亂估先。


伊利沙伯醫院發言人向Emily證實，相中地點喺伊院主座地下大堂正門，話對事件十分關注，提醒任何人有不當行為，醫管局會提檢控，但噚日就無收到投訴話有人喺嗰度便溺。