CY探長者送番薯葉

【明報專訊】特首梁振英呢排新聞多多，唯一可以稍為休息，就係自己出去參觀而唔通知記者喇。CY噚日喺網誌透露，前日佢參觀「長者安居樂住屋計劃」位於東九龍佐敦谷嘅彩頤居，探訪其中一個住戶時，送咗自己喺禮賓府種嘅新鮮蔬菜畀人。當時CY手持一大籃菜想逐一介紹，但佢講咗番薯葉同莧菜後，餘下一款就唔係好識講。對方見到CY咁有心，就問佢「可唔可以教埋我點煮」，CY就答「全部清炒就得」。


同長者打乒乓

CY話，踏進彩頤居，感覺好似一間設施齊全嘅酒店，呢個屋苑，地下至3樓有唔同種類嘅配套，包括酒樓、便利店、健身室、暖水泳池、卡拉OK房、圖書館、陶藝室、理髮店、中西醫診所、長者康復護理院舍等，一應俱全。CY參觀乒乓球室時，仲同長者打咗幾板波，有輸有贏，大家開心咪得囉。