無端變Plan B 馬逢國擰頭

【明報專訊】近期外界盛傳中央有意換特首，有報道指中央物色嘅Plan B人選，包括港區全國人大代表馬逢國，唔少人都覺得意外，有啲仲講笑話要恭喜佢。但屬「梁粉」嘅馬逢國就急急澄清，話呢個傳聞無基礎，相信只係不滿政府嘅人先咁講喎！另外兩個被指獲點名做Plan B人選嘅立法會主席曾鈺成同新民黨主席葉劉淑儀就異口同聲話唔會回應無根據嘅傳聞。


田少：Plan B一定有 出事先公布

據《壹週刊》報道，現任政務司長林鄭月娥、前財政司長梁錦松二人都係中央考慮特首人選之列。自由黨黨魁田北俊話，中央過去幾十年來一直培養人才，Plan B一定有，但Plan B都係會到出事先話你聽，佢呢一刻無聽過傳聞。田少認為，傳聞同辭任行會成員嘅張震遠涉商交所調查無關，反而同市民對社會政策有好大意見有關係，例如房屋同買家印花稅政策，都引起市民不滿，對梁振英（CY）一定有影響。


王光亞闢謠 李卓人：有人心虛

換特首之說突然講到似層層，搞到港澳辦主任王光亞噚日要透過漁農界訪京團嚟闢謠，工黨主席李卓人話「空穴來風，定必有因」，王光亞此舉係反映有人心虛；工聯會王國興唔信有Plan B，而中央及時否認、政治上對CY表達支持，佢覺得係好事。