大劉阿仔講扶貧唔講阿爸

【明報專訊】智經研究中心噚日發表有關商界扶貧嘅研究，智經副主席劉鳴煒主力負責呢項研究，佢哋建議商界可以邀請行內傑出人士做「人生導師」，培養清貧學生嘅社交能力等，商界又可以考慮資助低收入家庭學生報讀私人補習，以及畀清貧但成績一般嘅學生喺企業實習嘅機會。


想普選但對佔中有保留

劉鳴煒講扶貧滔滔不絕，但對其他話題就堅決封口。好似當日係唐營核心嘅佢，就話唔評論特首梁振英以至今屆政府嘅整體表現，有人問佢爸爸、華人置業主席劉鑾雄身體點呀？劉鳴煒就話呢個問題唔係好關扶貧事，隨即轉身離開。


咁有咩話題劉鳴煒肯回應呢？作為商界嘅佢，就肯回應話對佔領中環有保留喇，佢話佢都想落實雙普選，但就覺得佔中阻塞交通，又話恐怕呢個表達方式，有份決策政改嘅人唔會認同。