蕭若元新網台名字夠謎離

【明報專訊】蕭若元今年3月底摺咗香港人網，同黃毓民割蓆，隔咗兩個月，蕭若元捲土重來，新網台會喺6月3日開咪，但初期只會喺夜晚做兩個半鐘節目。今次個台名夠古怪，唔再叫香港人網，而係叫香港謎網。


命名「謎米香港」 簡稱謎網

唔通香港真係咁迷惘？原來個網全名係謎米香港（memehk.com），謎米（meme）係近年納入牛津詞典嘅新詞，出處係遺傳學書籍《自私的基因》，講嘅係人類以模仿方式複製文化同知識。


蕭若元噚日宣布，會喺6月1日公布新網台嘅節目時間表同主持人名單。佢話謎米香港係代表思想傳遞，佢最鍾意啲特別名同有爭議嘅名，所以揀咗呢個做網台名，等大家唔明白時會問吓係咩意見。至於簡稱謎網，蕭若元話有啲存在主義嘅味道。不過，睇番謎網facebook，似乎呢個名唔算太受歡迎，有網民話覺得好古怪咁話。